ROXAS CITY – Nagpasiguro ang presidente sang Hugpong Transport Capiz nga si Mr. Joebert Carandang nga magasunod ang transport sector sa mandatu sang LTFRB, nga ipatuman ang 20% nga diskwento sa pamasahe sang mga estudyante santu sa memorandum circular sang LTFRB.
Apang suno kay Carandang nga kinahanglan nga magpakita sang ID ang nagasakay nga mga pasahero sa tanan nga pampubliko nga salakyan, agud masiguro nga mga estudyante gid man sila.
Nahibaluan nga magabayad sang multa nga P5,000 ang pampubliko nga mga salakyan kun mapamatud-an nga nagalapas sila sa pagsulundan sang LTFRB.
Nahibaluan nga ginpaguwa na sang Land Transportation Franchising and Regulatory Board (LTFRB) ang memorandum circular No 2017-024 nga nagamandu sa mga public utility jeepney’s/ vehicles (PUJs), (PUVs) kag tanan nga pampubliko nga salakyan nga ipatuman ang 20 porsyento nga diskwento sa pamasahe sang mga estudyante, kalakip ang mga holidays kag summer breaks.
Nahibaluan nga ang memorandum circular No 2017-024 nga gin-isyu sang Oktubre 11 ang naga-amyenda sa memorandum circular No. 2005-014 nga tanan nga estudyante ang maka-avail sang 20 porsyento nga diskwento sa pamasahe humalin Lunes tobtob Domingo kalakip ang summer breaks, legal kag special holidays.
Apang klaro sa memorandum nga wala nalakip sa maka-avail sang diskwento sa pamasahe ang mga post-graduate students kasubong sang nagakuha sang Medicine, Law, Masteral kag doctoral degree.
Mangin epektibo ang amendment sa diskwento sa pamasahe sang mga estudyante sa Oktubre 28, 2017.
