CUARTERO, CAPIZ – Ginbawian na sang kabuhi ang mag-iloy nga pasahero sang tricycle matapos aksidente nga nabungguan sang isa ka salakyan ang ginsakyan nga traysikol sang mag-iloy sa National Highway sang Barangay, Bitoon, Ilaya, Cuartero, Capiz.
Ginkilala ang driver sang traysikol kay alyas Leomar, 22-anyos, samtang ginkilala naman ang sakay sini nga sanday alyas Ivy, 20-anyos, live-in partner sang driver kag alyas Chalea, 2-month-old, bata sang driver nga lunsay mga residente sang Barangay, Bitoon, Ilaya, Cuartero, Capiz.
Ang driver naman sang salakyan nga nakabunggo sa nasambit nga tricycle kay alyas Clyde, 24-anyos, residente sang Brgy. Salvation Habog Habog, Molo, Iloilo City. Ginkilala naman ang driver sang isa pa ka salakyan nga na-imbolbado kay alyas Ben, 46-anyos, isa ka businessman kag residente sang Brgy. Mongpong, Roxas City.
Sa inisyal nga impormasyon nga nakuha sang Bombo Radyo nagikan sa Cuartero MPS, ginapahayag nga samtang ginasubay sang driver sang traysikol ang dalanon halin sa banwa sang Dumarao, aksidente ini nga na-sideswiped sang amo nga salakyan samtang ginasubay man ang kasubong nga direksyon sang dalanon rason nga naglapaw ini sa pihak nga bahin.
Bangud sa mabaskog nga impact, inapok sa pihak nga linyada sang dalanon si Ivy kag aksidente man nga nabungo sa isa man ka salakyan nga na-imbolbado nga ginamaneho ni alyas Ben.
Nag-angkon sang pilas sa lawas ang mag-iloy nga pasahero sang traysikol nga gilayon naman nga ginrespondehan sang Cuartero Emergency Response Unit kag ginpadangat sa Dao District hospital para kuntani sa nagakaigo nga pagbulong apang wala nagdugay ginbawian ang mga ini sang kabuhi.
Sa karon, yara na sa paghinakop sang Cuartero MPS ang mga driver sang na-imbolbado nga mga salakyan para sa nagakaigo nga disposisyon.
