ROXAS CITY – Ginpadangat sa duha ka magkatuhay nga ospital sa probinsya ang lima sa anum ka mga sakay sang traysikol nga nahulog sa kantil sa Sitio Proper, Barangay Agtatacay Sur, Sapian Capiz.
Ang anum ka mga sakay sang nasambit nga traysikol ang indi na luyag pagpangalanan sang pamilya.
Sandig sa imbestigasyon sang traffic section sang Sapian MPS, nga nagikan sa isa ka beach sa Brgy. Lonoy sa amu nga banwa ang traysikol kag papuli na sa ila mga puloy-an.
Apang pag-abot sa lugar, nag-awas ang karito sa side wheel rason nga nadulaan sang kontrol sa pagmaneho ang 22-anyos nga driver kag nakabunggo ini sa tamburong, nga gintunaan sang ila pagkahulog sa kantil.
Bangud diri, nag-angkon sang kapilasan sa lawas ang lima ka mga pasahero kalakip ang driver.
Masuwerte nga wala napilasan ang 6-ka tuig nga lalaki.
Madasig nga gindala sa Mambusao District Hospital ang 3, samtang 2 ang gindala sa Roxas Memorial Provincial Hospital (RMPH) para sa pagbulong.
