ROXAS CITY – Ginpamatud-an lamang ni John Leerams Chicano nga siya sa gihapon ang TriAksyon man matapos napabilin sini ang kampeonato sa 2nd Capiz International Triathlon nga ginpatigayon sa Roxas City kag probinsiya sang Capiz.
Madinalag-on nga nadepenshan ni Chicano ang titulo bilang kampeon sa Elite category sang nasambit nga sporting event.
Matunog nga palakpakan ang nabaton ni Chicano gikan sa iya mga fans nga naghulat sa iya sa finish line.
Nakuha naman ni August Benedicto ang 2nd place kag 3rd place naman si Nico Huelgas.
Samtang nagkuha naman sang atensyon ang isa ka triathlete nga nagagmit lamang sang artificial leg matapos mautdan sang isa ka tiil.
Aminado si Rody Fernandez nga mabudlay ang iya nga sitwasyon apang mas luyag sini nga mapakita sa tanan nga sa pihak nga may kulang sa iya nga lawas, masarangan sini nga makigkumpetensiya sa iban nga mga atleta.
Nahibaluan nga wala lamang naglangoy si Fernandez apang nagbisikleta kag naglakat ini gamit ang artificial tobtob malab-ot ang finish line.
