ROXAS CITY, CAPIZ – Gin-ako sang isa ka tricycle driver ang akusasyon nga pagpangbastos sa isa ka 18-anyos nga estudyante nga iya pasahero, matapos nga nag-atubangay sila upod ang mga ginikanan sang biktima sa opisina sang Traffic Management Unit (TMU) Roxas City.
Sa interview sang Bombo Radyo kay TMU Head Mr. Gonzalo Andrada, boluntaryo nga nagpadulong sa ila opisina ang tricycle driver agud mag-atubang sa estudyante nga nagsumiter sang reklamo, samtang kaupod sang biktima ang iya ginikanan kag tiya sa pag-atubang sa driver.
Suno kay Andrada, nagpakita sang paghinulsol ang driver kag nagpangayo sang pasensya sa complainant.
Pahayag niya, ginpahanumdoman sini ang driver sang ila obligasyon nga amo lamang ang magpanukot sang plete kag ipakita ang respeto sa mga pasahero.
Dugang pa sang natungdan, gin-isyuhan ang driver sang citation ticket sa paglapas sang ordinansa batok sa ‘arrogant and discourteous behavior towards passengers’ kag nagbayad ini sang P200 bilang penalidad.
Panugyan ni Andrada nga dapat paminsaron sang tanan nga tricycle drivers nga may yara sila sang responsibilidad nga protektahan kag respetuhon ang ila mga pasahero, ilabi na kun kabataan ukon menor de edad.
Matandaan nga ginpakigbahin sang estudyante ang iya nga indi manami nga experience nga pagpangbastos sang tricycle driver samtang nagasakay ini halin sa eskwelahan. Suno sa iya nga Facebook post, nagsakay siya sa isa ka tricycle nga nagaduag Green sang pauli na siya halin sa Capiz State University bangud tapos na ang iya nga klase.
Samtang nagabyahe, natalupangdan niya ang indi maayo nga pakikitungo sang driver kag ginpamangkot siya sang mga personal nga butang kasubong sang mga masunod: “Ikaw lang isa sinyo boarding house?”, “May migo ka na?”, “Okay lang man bay isugat dul-ong taka sa imo skwelahan?”, kag “Ngaman mapuli kana ya? Pa-SM ta bala anay?”
– With an interview from Bombo Sunnie Mae Constantino Batencila
