ROXAS CITY-Ginkompirmar sang alkalde sang banwa sang Pilar nga may yara sang isa ka panibag-o nga kaso sang COVID-19 nga napagkit sa nasambit nga banwa.
Sa official statement ni Pilar Mayor Arnold Perez sa Facebook ginpahayag sini nga isa ka 28-anyos nga lalaki nga tripulante sa sakayan nga nagpangisda sa Estancia, Iloilo ang nagpositibo sa COVID-19.
Suno kay Perez nga Agosto 15 sang nagpauli ini gikan sa Estancia apang ginhold sang border security checkpoint bangud mataas ang iya temperatura.
Gilayon ini nga gindala sa Barangay Quarantine Facility kag ginpaidalom sa Rapid Anti-body test kun sa diin nag-negatibo ang resulta.
Gindugang pa sang alkalde nga gin-abisohan ini nga magpaidalom sa strict home quarantine samtang ginahulat ang resulta sang RT-PCR test.
Apang sang Agosto 25, nagpositibo ini sa RT-PCR kag gilayon nga gindala sa Municipal Quarantine Facility.
Sa karon nagapabilin nga asymptomatic ang nasambit nga indibidwal nga ginapaidalom na sa 14-day quarantine.
