Ginahingyu ni Solicitor General Darlene Berberabe sa Korte Suprema nga i-basura ang urgent manifestation ni Senator Ronald Dela Rosa nga nagapangayo nga kilalahon sang hukuman ang pahayag ni Ombudsman Jesus Crispin Remulla nga daw nagpagwa na sang arrest warrant ang International Criminal Court (ICC) kontra sa iya.
Suno kay Berberabe, ang ginhambal ni Remulla sa media indi opisyal nga pahayag sang gobyerno, kundi personal lang nga impormasyon nga indi mabilang bilang ebidensya.
Dugang pa niya, nga wala pa sang aktwal nga warrant halin sa ICC, gani wala sing klaro nga legal nga katungod si Dela Rosa nga protektahan sang korte.
Madumduman, sang bulan sang Nobyembre, ginbaliwala sang Supreme Court ang petisyon ni Dela Rosa nga piliton si Remulla nga ipagwa ang ginahambal nga warrant. Ginsundan ini sang madali nga pagpakita sang Senador nga nagapangayo sang TRO batok sa implementasyon sang ginahinalaan nga ICC order.
Nangin kontrobersyal ang isyu matapos ginpahayag ni Remulla sa radyo nga may impormasyon siya nga may warrant batuk kay Dela Rosa, nga nagsilbi nga PNP chief sa una nga yugto sang drug war sang administrasyon Duterte.
