Nagpaguwa sang hugot nga paandam si US President Donald Trump sa Iran, nga nagadeklarar nga kun atakehon ang Estados Unidos, ma-eksperyensyahan sini ang “bug-os nga pwersa” sang Amerikano nga militar sang pungsod.
Sa isa ka post sa Truth Social, ginpanginwala ni Trump nga nadalahig ang U.S. sang mga airstrikes sang Israel sa Iran.
Gin-ako ni Trump nga ang U.S. nagbulig sa Israel batok sa mga missile, apang wala nagpasilabot sa direkta nga pag-atake sa Iran.
Ginpabugal pa ni Trump nga sila, upod sa Israel, mahimo gilayon nga tapuson ang inaway kon luyag nila.
Sa pihak nga bahin, ang Iranian Foreign Minister Abbas Araghchi nagpahayag nga may yara sila sang ebidensya nga nagapakita sang ginaalegar nga suporta gikan sa Estados Unidos para sa mga pag-atake nga ginhimo sang Israel.
Samtang, ginpahayag man ni Trump sa isa ka pag-istoryahanay kay Russian President Vladimir Putin nga dapat magbinuligay ang mga pungsod agud tapuson ang inaway sa tunga sang Israel kag Iran.
Apang madumduman nga ang mga opisyales sang Russia nagpabutyag sang ila padayon nga suporta para sa negosasyon sa programa nukleyar sang Iran.
Ang Alemanya, upod ang Pransia kag Britanya, nagpabutyag man sang ila kahanda sa paghambal sa Iran nahanungod sa ila nukleyar nga programa agud malikawan ang paglala sang sitwasyon sa Natung-an nga Sidlangan.
