ROXAS CITY – Tuman nga depresyon ang ginalantaw rason sa paghikog sang 31 anyos nga mister kag pagpatay man sini sa iya kaugalingon nga tatlo ka tuig nga anak sa sulod sang ila balay sa Barangay San Jose, Roxas City.
Sa interview sang Bombo Radyo Roxas kay Police Master Sergeant Ramil Arcangeles, tigpamaba sang Roxas City Police Station, ginpahayag sini nga base sa ila pag-imbestiga, may indi sang pag-intiendihanay si Jaypee Capapas kag asawa sini nga nagatrabaho sa luwas sang pungsod.
Ini suno sa iya ang posible nagtuga sang tuman nga depresyon kay Capapas rason nga nahimo sini nga patyon ang kaugalingon nga anak pinaagi sa pagkuga gamit ang electrical cord kasunod sang pagbitay man sini sa iya kaugalingon gamit ang nylon rope.
Indi man halos makapati si Delia Capapas, tiya ni Jaypee nga nahimo nga patyon sang iya hinablos ang kaugalingon sini nga anak bangud malapit suno sa iya ang mister sa iya duha ka mga kabataan.
Nakit-an na lamang nga may electrical cord sa liog sang bata nga ginapatihan gingamit ni Jaypee sa pagkuga sa anak.
