Huya ang nadangtan sang Duha ka German tourists sa Nakhon Si Thammarat, Thailand, pagkatapos nga nagsulod sila kag nagpungko sa isa ka Funeral, sa paglaum nga isa ini ka restaurant.
Suno sa ila, Ginsunod lang nila ang baho sang manamit nga pagkaon halin sa night market kag nakadto sila sa lugar sang seremonya.
Nakita sila sang mga Pamilya sang namatyan nga nagapungko kag daw nagahulat sang menu.
Sang ginpalapitan kag ginpaathag sa ila nga funeral service ang ginsudlan kag indi kalan-an, gilayon sila nga nangayo sang pasaylo.
Apang sa baylo nga pabay-an sila, ginpamatud-an sang pamilya sang napatay ang pagkamaabiabihon sang mga taga-Thailand kag ginhagad pa sila nga magtinir kag ginpakaon sang iced milk kag fried dough sticks.
Sa kultura sang Thai, ilabi na sa mga probinsya kaangay sang Nakhon Si Thammarat, ang Funeral masami nga ginahiwat sa bukas nga lugar sang isa ka templo sang Bhuddist kag bukas sa publiko, sa diin ang mga tawo nga luyag magsimpatiya hilway sa pagtambong.
Masami naka-buffet style ang mga pagkaon kaangay sang kan-on, sud-an, kape, kag iced milk.
Bangod nga welcoming ang atmosphere ilabi na sa gab-i, masami nga nagakasal-an sang mga dumuluong nga isa ka ini ka restaurant, ilabi na kon yara sa tupad sang night market ang Templo.
Ang makahalam-ot lang, daw nangin “hotspot” ang nasambit nga Funeral bangud makaligad ang duha ka adlaw, nagsulod didto ang isa ka grupo sang Dutch travelers kag namangkot kon nagaserbe sila sang cocktails,sa pagdumdom nila nga resto-bar ini.
Kaangay sang una, ginpakaon man sila sang pamilya, nga nagtuga sa mga dumuluong nga nagdayaw sa kaayo sang mga taga-Thailand kag nagsiling nga “ang mga taga-Thailand amo ang pinakamabuot sa kalibutan”.
