ROXAS CITY – Nangin matawhay ang ginpatigayon nga turn-over conference kaupod ang mga transition teams nanday governor elect Esteban Nonoy Contreras kag outgoing governor Antonio del Rosario sa governors hall sa provincial capitol.
Nahibaluan nga wala nagtambong sanday outgoing governor Del Rosario kag incoming governor Contreras sa nasambit nga seremonya.
Apang, ang nagrepresentar kay Del Rosario amo ang iya anak nga si provincial administrator Michelle Del Rosario.
Yara man ang presensya sang halos tanan nga mga department heads sang provincial capitol.
Ginpangunahan naman ni Edwin Monares ang transition team ni Contreras.
Isa-isa nga ginpakilala ni Michelle ang mga department heads antes magsugod ang turn-over ceremonies.
Naghatag man ini sang mensahe angut sa mga improvement sa ikaayo sang mga pampubliko nga ospital sang del Rosario administration.
Suno naman kay Melanie Arancillo, pinuno sang hospital management unit nga bugal sini nga mahatag ang tanan nga mga dokumento nga nagapakita sang pagbag-o sang mga ospital sang nagpungko si del Rosario sa pwesto.
Samtang, ginpasalamatan naman si Edwin Monares ang mga department heads nga nagtambong sa turn-over ceremony.
Ginpahayag man ni Monares nga kinahanglan isumiter ang tanan nga dokumento antes ang pagpungko ni governor elect Contreras.
Dugang pa sini nga nabaton na nila ang mga dokumento apang tsekyaron pa ini sang miyembro sang transition team.
