ROXAS CITY – Nagapabilin sa Roxas Memorial Provincial Hospital (RMPH) ang isa ka lalaki matapos maaksidente sa ginamaneho nga motorsiklo sa Arnaldo Boulevard, Barangay Baybay, Roxas City, kagab-i sang Domingo, Hunyo 26.
Sandig sa deskripsyon ni PCpl Kim Alvin Torres, traffic investigator sang Roxas City PNP, ang wala pa makilala nga driver ang may kataason nga ginabulubanta 5’7, may magamay nga alom sa idalom nga bahin sang bibig, nagasuksok sang dark blue shirt, light yellow nga jacket kag yellow floral short, nga ginapahayag yara sa impluwensiya sang makahulubog nga ilimnon sa tion sang aksidente.
Ba-se sa imbestigasyon, ginasubay sang driver ang dalanon sakay sa iya Yamaha FS 110 nagaduag dark red, nagikan sa Barangay Baybay padulong sa City proper, sang mabungguan sini ang naka-park nga Suzuki shooter 115Fi sa kilid sang karsada.
Bangud sini, nadulaan ini sang alinto, kag nag-angkon sang kapilasan sa iya ulo kag iban pa nga parte sang iya kalawasan.
Ginrespondehan ini sang mga katapo BFP-Roxas City kag gindala sa nasambit nga ospital.
