Ginpanindugan naman ni US President Donald Trump nga dapat akuon sang Amerika ang Greenland agud mapunggan ang Russia kag China sa paghimo sini.
Ginhatagan pagtamod sang Presidente sang Estados Unidos ang pagdepensa sa Greenland kag nagsiling nga himuon nila ini sa bisan ano nga paagi nga kinahanglanon.
Una na nga gin-anunsyo sang White House nga ang administrasyon ni Trump nagabinagbinag sang “pagbakal” sang Denmark-controlled Greenland bilang iya autonomous territory, apang wala sini ginasikway ang opsyon nga himuon ini nga isa ka annex paagi sa pwersa.
Apang, ang Denmark kag Greenland pareho nga nag-insister nga ang amo nga teritoryo indi “ginabaligya”. Nagpaandam man ang Denmark nga sa tion nga may ilunsyar nga military action sa ila pungsod, mahimo ini nga mangin umpisa sang katapusan sang defense alliance nga amo ang North Atlantic Treaty Organization (NATO), nga lunsay katapo sang US kag Denmark.
Makapila ka beses nga ginpahayag ni Trump nga ang lokasyon sang Greenland importante sa pungsodnon nga seguridad sang Amerika, sa diin ginaalegar nga ginapalibutan ini sang mga barko sang China kag Russia sa tanan nga kilid, apang wala sang bastante nga ebidensya para sa sini nga alegasyon ni Trump.
Ang Greenland nahamtang man sa tunga sang North America kag Arctic, nga nagahimo sini nga isa ka maayo nga lokasyon para sa early warning systems sa tion nga may yara sang missile attacks kag para sa pagmonitor sa mga sakayang pangdagat nga nagalibot sa rehiyon.
Sa idalom sang nagaluntad nga kasugtanan sa tunga sang Estados Unidos kag Denmark, ang US may gahum sa pagpadala sang madamo nga mga tropa sa Greenland kon luyag nila.
Sa isa ka statement, ginpanindugan sang Greenland party leaders kaupod ang oposisyon, ang ila pagpamatok nga makontrol ang Amerika kag nag-insister nga ang palaabuton sang Greenland dapat desisyunan sang mga taga-Greenland.
