ROXAS CITY – Pilas sa nawala nga hita kag palanakit sa lawas ang naangkon sang driver sang Van, matapos bumunggo ini sa ginasundan nga Truck, sa national highway sang Barangay Bula, Mambusao, Capiz.
Ginkilala ang napilasan kay Romir Labuson, 30 anyos driver sang Fuso Canter Van kag residente sang Brgy. Cari Minor, Leganes, Iloilo.
Samtang ang nabungguan sini nga Wing Van Truck ang ginamaneho ni Rene Bacordo, 36 anyos kag residente sang Leiling, Hagonoy, Davao Del Sur.
Sandig sa inisyal nga imbestigasyon sang katapo sang Mambusao Municipal Police Station, nga lunsay ginasubay sang duha ka mga truck ang direksyon pa Iloilo, sang tuyo kuntani magpundo ni Bacordo bangud sa ginakay-o nga dalan, sang hinali nalang nga bumunggo sa nalikod nga bahin sang ginamaneho sini nga truck ang nagasunod sa iya nga si Labuson.
Bangud sini, nag-angkon sang kahalitan ang nabungguan kag ang bumunggo nga salakyan, subong man ang driver nga si Labuson.
Ginpadulongan sang mga katapo sang MDRRMO kag Special Rescue Force sang BFP-Mambusao ang biktima kag natigayon nga madapatan sang pauna nga pagbulong antes ginpadangat sa pinakamalapit nga ospital.
Ginkustodiya ang magtimbang nga salakyan sa Mambusao police station para sa nagakaigo nga disposisyon.
