ROXAS CITY – Puno ang Capiz Gymnasium, ang venue sa diin ginpatigayon ang Bombo Medico 2018 sa Roxas City kag probinsiya sang Capiz.
Wala nangin upang ang mainit nga panahon sa syudad sang Roxas para madamo ang magpila nga mga pumuluyo kag maka-avail sang libre nga medical kag dental check-up gikan sa mga volunteer doctors, nurses, dentist, members sang Philippine Army kag iban pa nga naghatag sang ila nga oras.
Ginpilahan sa nasambit nga aktibidad ang circumcision kag check-up sa mata, sa diin pila ka mga Capizeño ang nahatagan sang libre nga reading glasses.
Magluwas diri, nagpanagtag man sang prosthetic ukon artificial hand ang LN-4 foundation sa mga pumuluyo nga nautdan sang kamot para liwat sila nga mangin independent, may libre man nga haircut ukon gunting sa buhok kag iban pa nga serbisyo.
Samtang, isa lamang sa pila ka mga opisyal sang gobyerno probinsiyal si Vice Governor Esteban Nonoy Contreras nga nagpakita sang suporta sa Bombo Medico 2018.
Suno kay Vice Governor Contreras nga saludo ini sa tuigan nga proyekto sang Bombo Radyo Philippines, bangud daku nga bulig ini nga aktibidad sa provincial government agud mapadasig ang pagbulig sa mga pigado nga mga pumuluyo.
