ROXAS CITY – Pagatutukan ni Bise-Presidente Leni Robredo ang pagpaumwad sang kabuhi sang mga yara sa ‘laylayan’ ukon ang sektor nga indi halos matalupangdan sang gobyerno sa Visayas partikular na sa isla sang Panay kag Negros Occidental.
Ini ang ginpahayag sang bise-presidente kasunod sang iya pormal nga paghatag sang P5 million financial assistance sa 1, 877 ka mga mangunguma nga miyembro sang Panit-an Integrated Farmer’s Association sa iya nga pagbisita sa Capiz.
Pagagamiton ang nasambit nga pondo sa proyekto sang asosasyon kalakip na ang pagbakal sang pila ka mga kagamitan sa panguma kapareho sang four-wheel drive tractor, combine rice harvester kag rice transplanter.
Magluwas sa pinansiyal nga bulig gikan sa bise-presidente, naghatag man sang P980, 000 nga counterpart ang lokal nga gobyerno sang banwa sang Panit-an.
Suno kay Robredo nga luyag sini nga masiguro nga antes ang pagtapos sang iya nga termino sa tuig 2022, mapaumwad sini ang kabuhi sang mga mangunguma pinaagi sa Ahon Laylayan Koalisyon (AKL).
Matapos ang isla sang Panay, magabisita man ang bise-presidente sa Bohol, Cebu kag pila ka lugar sa Eastern Visayas agud makahatag sang iya nga bulig.
