Gintalakay sang House Committee on Appropriations ang panukala nga pondo sang Office of the Vice President (OVP) para sa masunod nga tuig nga nagabalor sang 2.037 billion pesos.
Nagtambong mismo si VP Sara Duterte, kag sa nangin opening statement sini ginsabat sini ang mga isyu batuk sa iya kasubong sang libro nga ini ang may akda, West Philippine Sea, ang ginaalegar nga impeachment batuk sa iya, kag iban pa.
Matapos ang budget presentations sang iya nga talatapan, nag-atrs na si VP Sara Duterte sa kahigayunan nga sabton ang mga pamangkot sang mga kongresista, kag ang pahayag sini bahala na ang kamara kun aprubahan ukon indi ang OVP budget.
Nagpadayon naman si ACT Teachers Party-list Representative France Castro nga usisaon ang natuhoy sa 125 million pesos nga gingastos sang 11-adlaw sang OVP sang 2022.
Nagdepensa si VP Sara Duterte diri kag nagpahayag nga gina-imbitahan ini agud diskusyunan ang proposed 2025 budget kag indi ang budget sang mga nakaligad nga tuig, kag kadungan sini, ginkuwestyon sini ang rules sang budget hearing.
Samtang, gin-apinan naman ni anay Presidente Gloria Macapagal Arroyo si VP Sara Duterte sa katwiran nga indi na dapat ibalik ang mga isyu sa budget sang mga nakaligad nga tuig kaangay sang confidential funds nga naresolba ukon naistoryahan sang maayo sa budget hearing sa mga nakaligad nga tuig.
