Gindayaw ang walo ka tuig nga si Victoria Isaac matapos ginkilala sang Guinness World Records bilang pinakabata nga babaye nga music producer sa edad nga 8 ka tuig kag 160 ka adlaw, kadungan sang pagguwa sang iya debut album nga Musically Fantastic.
Ang iya talento sa musika nagtuhaw sa edad nga tatlo ka tuig, sang makatukar siya sang mga nursery rhyme gamit ang isa ka smartphone app paagi lamang sa pagpamati. Sa pag-eskwela sa ila balay, gintudluan niya ang iya kaugalingon sa pagtokar sang violin, tambol, piano, kag gitara sa bulig sang YouTube antes magkuha sang isa ka propesyonal nga manunudlo.
Bilang isa ka producer, siya ang utok sa likod sang iya mga ambahanon, naga-areglo sang tunog sang mga instrumento, naga-mix sa software, kag nagahimo sang katapusan nga track, nga iya ginapaanggid sa pagdrowing nga may mga tunog.
Ang iya panguna nga ambahanon nga Flying Drone Dance nagapakita sang iya estilo sang Skate-Dance Music, nga gin-inspirar sang iya idolo nga si Lindsey Stirling, nga nagatukar sang violin samtang naga-roller skate. Handum ni Victoria nga madala pauli ang isa ka Grammy Award sa palaabuton.
