DUMARAO, CAPIZ- Posible nga ginkuha sang tawo man mismo ang bata nga sa gihapon nagapabilin nga missing sa Barangay Aglanot, Dumarao, Capiz.
Ang nadula nga bata amo si Rona Mae Carum, 8-anyos, isa ka Grade 2 pupil kag residente sang nasambit nga lugar.
Sa interview sang Bombo Radyo kay Punong Barangay Norlie Lagos, sang nasambit nga lugar, iya ginpahayag nga sa gihapon nagapadayon ang ila nga pagpangita sa amo nga bata.
Suno kay Lagos, may yara sang iban sa ila ang kaangay nadulaan na sang paglaom nga makita pa ang amo nga bata, bangud suno sa iya, kun ara manlang sa gihapon ini sa ila barangay, nakita na ini nga daan samtang nagapatigayon sila sang search and rescue operations.
Pahayag pa nya, posible nga ginkuha sang tawo lang man nga kaangay sa aton ang amo nga bata.
Madumduman nga sang Setyembre 23, 2025 nadula ang amo nga bata.
Dugang pa sang natungdan, nagalaum sa gihapon ang pamilya sang bata nga yara lang ini sa maayos nga kahimtangan kag makita na ini nila agud nga magtawhay naman ang tagsa nila ka mga kaisipan.
Interviewed by Bombo Francis Biñas
