Ginkumpirma sang Philippine National Police (PNP) nga sa idalom na sang protective custody sang kapulisan ang whistleblower nga involved sa kaso sang nagkaladula nga mga manugbulang halin 2021 tubtob 2022.
Ginpahayag ni PNP chief Police General Nicolas Torre III nga yara na sa ila paghinakop si “Totoy”, ang nagapanguna nga testigo sa kaso.
Suno kay Torre, ginmakay-o naman ang aplikasyon sang whistleblower sa Witness Protection Program (WPP) sang Department of Justice (DOJ).
Kadungan sini, ginkumpirma man ni Torre nga 15 ka pulis ang yara sa restrictive custody sa Camp Crame, matapos nga gintudlo sang whistleblower nga involved sila sa pagkadula sang mga manugbulang. Pito diri ka pulis ang na-dismiss na sa serbisyo sadtong Enero 2023.
Suno kay Torre, may pila ka pulis nga ginapahayag nagabaton sang tubtob P2 million nga payola kada bulan halin sa negosyante nga si Atong Ang—nga ginaalegar isa sa mga mastermind sang krimen, suno sa whistleblower.
Padayon ang imbestigasyon sang PNP sa iban pa nga mga personalidad nga posible involved, pati man sa posibilidad nga mga lokasyon sang mga biktima.
Sa kabug-usan, 34 ka manugbulang ang na-report nga nadula.
Base sa imbestigasyon, gin-abduct ang mga ini bangud nga nagdinaya sa mga bulang.
Dugang pa ni Torre, ginpahayag sang whistleblower nga ang mga biktima ginlubong na sa Taal Lake, apang padayon man nga gina-imbestigaran sang PNP ang iban pa nga lugar kun diin posible nga ginhaboy ukon ginsunog ang mga lawas.
