Gin-aprubahan na sang Sangguniang Panlalawigan sa ikatatlo kag ulihi nga pagbasa ang ordinansa nga may tinutuyo nga pasangkaron ang programa sa paglikaw kag early detection sa X-linked Dystonia Parkinsonism (XDP) ukon “Lubag”.
Sa interview sang Bombo Radyo kay Board Member Dr. Cesar Yap Jr., Chairman sang Committee on Health, iya ginpahayag nga tinutuyo sang ordinansa nga maibanan ang stigma kag madugangan ang ihibalo sang komunidad sa nasambit nga balatian sa makatawo kag scientific nga pamaagi.
Suno kay Yap, ang ordinansa indi lang simple nga polisa kundi isa man ka daku nga tikang agud maproteheran ang mga masunod nga henerasyon kag mabuligan ang pamilya nga apektado sang nasambit nga balatian.
Nahibaluan nga ang X-linked Dystonia Parkinsonism (XDP) ukon “Lubag” ang isa ka hereditary movement disorder nga lapnagon sa isla sang Panay kun sa diin mga babayi ang carrier kag masami nga kalalakihan ang apektado.
Nagpanawagan man ang natungdan sa publiko nga mangin responsable sa mga opinyon batok sa nagasupreher sang balatian nga lubag bangud kaangay naton tawo man sila nga may balatyagon kag nagakinahanglan sang bug-os nga pag-atipan kag pag-intindi.
