ROXAS CITY – Padayon sa karon nga ginabulong sa ospital ang isa ka solterito nga napilasan sa engkwentro sang rebelde nga New People’s Army kag mga katapo sang militar sa Barangay Tacayan, Tapaz, Capiz.
Ini ang ginkompirmar mismo sang tagpamaba sang 3rd Infantry Division-Philippine Army nga si Major Cenon Pancito III sang mainterview sang Bombo Radyo.
Ang wala na ginhingadlan nga biktima ang naga-edad sang 15 anyos nga nakaangkon sang pilas sa iya nga hita.
Suno sa opisyal, naglawig sang tubtob lima ka minutos ang bayluhanay sang lupok sang indi magnubo sa lima ka mga rebelde kag katapo sang Community Support Program Team sang militar.
Wala sang may napilasan sa hanay sang militar apang naigu sang bala gikan sa mga rebelde ang nasambit nga sibilyan.
Posible nga nasal-an nga miyembro sang militar ang solterito rason nga gintiro ini sang makita sang mga rebelde.
Ginapahayag nga nagapatigayon sang Community Support Program to End Local Communist and Conflict (ELCAC) ang katapo sang militar sa lugar sang nagluntad ang nasambit nga insidente.
(NOT THE ACTUAL PHOTO)
