ROXAS CITY – Nagpabalhag ang 18-anyos nga lalaki matapos ginpahog kag ginsumbag sang body guard sang alkalde sang Maayon sa Soul Super club sa Grandville, Barangay Inzo Arnaldo Village, Roxas City.
Ginkilala ang tagreklamo kay Jun Mart Gacad sang Poblacion Swa, President Roxas, Capiz.
Sandig sa ginpabalhag sang tagreklamo, yara sila sa amo nga disco bar para magselebrar sang birthday sini.
Matapos magsaut nagdesisyon sila nga magbakal sang dugang nga pagkaon kag nagbiya sa ila gin-ukupahan nga lamesa.
Apang sa ila nga pagbalik may nagapungko na nga grupo sa ila lamesa rason nga naghinyo sila nga bakantehan ini bangud sila ang nakauna.
Apang ginaalegar nga nagpamahog ang nagpakilala nga bodyguard sang alkalde sang Maayon.
Matapos nakita ang indi maayo nga sitwasyon nagdesisyon na lamang ang grupo sang tagreklamo nga magbiya sa lugar, apang ginkakibot sini sang hinali siya nga ginsumbag sa nawala nga mata sang bodyguard ni Mayor Raymond Malapajo.
Ginpakamaayo na lamang sang tagreklamo nga magreport sa Roxas City PNP.
