ROXAS CITY – Nagbag-o ang painu-ino kag gin-atras sang 19 anyos nga babaye ang plano nga pagpasaka sang panumbungon sa isa sa duha ka mga lalaki nga una sini gintudlo nga naghimulos sa iya sa sulod sang iya hulot sa Barangay Cagay, Roxas City.
Ini ang ginpahayag ni Police Senior Master Sergeant Rose Olaveja, ang hepe sang Women and Children’s Protection Desk sang Roxas City Police Station sang mainterview sang Bombo Radyo.
Suno kay Olaveja, nagpirma sang affidavit of non-interest ang biktima nga si alyas Nene nga nagapatimaan nga indi na ini magpasaka sang reklamo batuk sa suspek nga si Alfredo Delid Jr. alyas Buday.
Ginpahayag ni Olaveja nga sang ila ginpatawag ang magtimbang nga bahin, ginpabutyag sang biktima nga naluoy ini sa suspek bangud pamilyado ini kag makabig niya man ini nga abyan.
Gindugang pa sang biktima nga kaupod pa sini kun kaisa sa pag-inom ang suspek kag ang iya mister, kag iban pa nila nga mga abyan.
Matandaan nga sandig sa una nga reklamo sang biktima, ginsulod siya sang duha ka lalaki sa diin ang isa ginkilala sini nga si Delid kaupod ang isa ka lalaki nga kalbo.
Matapos gin-uyatan sang mga suspek sa duha ka kamot ang biktima ginbusalan pa ang bibig sini kag gintutukan sang kutsilyo agud indi makasinggit.
Suno sa biktima nga ginbulus-bulosan siya nga ginhimuslan sang mga suspek kag wala ini makasinggit bangud sa kutsilyo nga ginatutuk sa iya.
