ROXAS CITY – Nagpatigayon sang pre-emptive evacuation ang pila ka mga kabanwahanan sa probinsya kadungan sang pagpanalasa sang Super Typhoon Rolly sa Pilipinas.
Ini ang ginpahayag ni Provincial Disaster Risk Reduction Management Office ukon PDRRMO head Judy Grace “Jing” Pelaez sang mainterview sang Bombo Radyo.
Suno kay Pelaez nga nagdangat sa 147 ka mga pamilya ang nag-evacuate nga ginabug-usan sang 581 ka mga indibidwal nagikan sa Pres. Roxas kag Pilar nga yara nagaistar sa mga high risk areas ukon dangered zone kag flooded areas.
Kalakip sa mga barangay sa Pres. Roxas nga naapektuhan amo ang Barangay Pinamihagan nga may yara sa 40 ka mga indibidwal kag isa naman sa Barangay Poblacion.
Pag-abot naman sa banwa sang Pilar ang mga barangay nga may yara sang napagkit nga mga evacuees amo ang Barangay Binaobawan nga may 157 ka mga indibidwal; Dulangan nga may 198; Natividad nga may 9 kag Rosario nga may 175.
Ginpahayag naman ni Pelaez nga ang iban diri sa ila ang nakabalik naman sa tagsa nila ka mga panimalay.
Samtang, padayon sa gihapon ang koordinasyon sang PDRRMO sa tagsa ka mga MDRRMO sang mga kabanwahanan
