ROXAS CITY – Nag-angkon sang kapilasan sa magkatuhay nga parte sang kalawasan ang duwa ka persona matapos nagbunggu-anay ang ila ginamaneho nga motorsiklo sa national highway sa Brgy Pob. Takas, banwa sang Cuartero.
Ginkilala ang biktima nga si Gazelle Andrew Mayoga, 22-anyos isa ka miyembro sang Philippine Army (12 IB) nga nakabase sa Camp Gen. Cefirino Escarion, Brgy Libot, Calinog Iloilo kag residente sang Sitio Huebesin, Celistino Villacin, Cadiz City, Negros Occidental.
Samtang ang suspek ang ginkilala kay Victor Dela Torre, 47-anyos kag residente sang Brgy. Bitoon Ilawod, sang nasambit nga banwa.
Sandig sa imbestigasyon sang Cuartero PNP, samtang ginasubay sang biktima ang dalan padulong sa direksiyon sang Iloilo sakay sa Yamaha XTZ 125 nga motorsiklo sang aksidente sini nga nabungguan ang suspek nga nagamaneho sang Motorstar nga motorsiklo nga hinali nagliko sa karsada nagikan sa pihak nga linya.
Base sa mga nakakita sang amo nga aksidente nga wala nag-signal light ang driver sang motorstar apisar nakita na sini nga may nagapadulong nga motorsiklo.
Bangud sa natabo lunsay nag-angkon sang kapilasan sa kalawasan ang mga nasambit nga persona nga madasig naman nga ginpadulungan sang Cuartero Emergency Response Unit agud dapatan sang pauna nga pagbulong ang biktima samtang ang suspek ang gindala sa Dao District Hospital para sa nagakaigo nga pagbulong sa iya natuo nga tiil. Ginkustodiya naman sang Cuartero PNP ang mga motorsiklo nga imbolbado sa insidente, samtang nag-settled naman ang magtimbang nga bahin.
