ROXAS CITY – Nagparekord sa Roxas City Police Station ang isa ka 37-anyos nga ginang matapos nga ginaalegar may yara sang isa ka persona nga nagatuga sang kinagamo sa Barangay Barra, Roxas City.
Ginkilala ang tagreklamo nga si Lourdes Cawaling sang nasambit nga lugar.
Sandig sa ginpabalhag sang tagreklamo nga nagatuga sang gamo sa ila barangay si Rosalina Admana 49-anyos kag yara sa idalom sang impluwensya sang makahulubog nga ilimnon.
Bangud diri, ginpakamaayo na lamang sang nasambit nga tagreklamo nga dal-on sa pulisya ang amo nga suspek para sa nagakaigo nga disposisyon.
Sa pihak nga bahin, gindala man sa pulisya ang isa ka 19-anyos nga persona matapos nga ginaalegar naga-iskandalo sa Barangay Banica sining siyudad.
Nahibaluan nga ginpakustodiya ni Rogelio Golinggan 29-anyos sa Roxas City Police Station ang suspek nga si Gerry Chavez matapos nga yara sa idalom sang impluwensya sang makahulubog nga ilimnon kag nagatuga sang gamo sa nasambit nga lugar.
