ROXAS CITY – Ginakabig sang duha ka mga kalalakinhan nga pinakamaswerte sila sini nga adlaw matapos nangin benepisyaryo sang prosthetic arm sa Bombo Medico 2017 nga ginpatigayon sa Capiz Gymnasiym, sa Villareal stadium.
Indi matapos tapos ang pagpasalamat nanday Alex Deo 48-anyos kag Roy Royo 30-anyos, bangud kasubong nga nagbalik sa normal ang tanan sa ila nga kabuhi kasunod sang nabaton nga prosthetic arm.
Suno kay Deo nga matapos nabatian sa Bombo Radyo Roxas nga may ihatag nga prosthetic arm gilayon ini nga nagpadulong sa istasyon para magpalista.
Ginpaahyag naman ni Royo nga kasubong tuig ang iya ginhulat sa pag-abot sang adlaw nga magapatigayon sang Bombo Medico rason nga temprano pa lamang nagpadulong na ini sa venue para masukat na ang prosthetic arm nga naghatag sa iya sang bag-o nga pag-asa.
Samtang magluwas sa prosthetic arm nangin maswerte man ang 92 ka mga pasyente nga naka-avail sang libre nga eyeglasses.
Sa kabug-usan naglab-ot sa 3, 814 ka mga tawo ang nakabaton sang libre nga medical kag dental check-up.
