ROXAS CITY – Nangin madinalag-on ang ginpatigayon sang 2nd Capiz Provincial Mobile Force Company nga Community Outreach Program sa Barangay Sibariwan, Dumarao, Capiz.
Kaupod sa nasambit nga aktibidad ang Dumarao Municipal Police Station, Regional Mobile Force Battalion 6, 12th Infantry Battalion sang Philippine Army, kag LGU Dumarao.
Kabahin sang nasambit nga aktibidad ang gift giving para sa mga kabataan, feeding program kag pagpanghatag sang food packs kadungan sa libre nga pagpagunting, serbisyo medical, dental check-up kag libre nga mga bulong.
Kadungan sini nga programa, nagtudlo man sa pag-ubra sang detergent kag fabric conditioner nga kabahin sang livelihood training program sang mga kapulisan agud makahatag sang dugang nga alternatibo nga pangabuy-anan sa mga residente sa nasambit nga lugar.
Nagpatigayon man sang seminar angut sa paglikaw sang krimen kag pagtudlo sa mga layi kasubong sang RA 9165 ukon Comprehensive Dangerous Drugs Act of 2002 kag Executive Order No. 70 ukon National Task Force to End Local Communist Armed Conflict (NTF-ELCAC).
Gintudluan man sang mga kapulisan ang mga miyembro sang Barangay Peacekeeping Action Team sang pamaagi sa pag-aresto ukon pagdakop sa isa ka persona nga nagatuga sang kinagamo sa mga lugar kag dugang nga ideya agud mamintinar ang kalinong kag katawhay sang mga kabarangayan.
Suno sa 2nd Capiz PMFC nga lauman sa mga nagkalain-lain nga sector sa mga kabanwahanan ang padayon nila nga pagserbisyo kag pagbulig kaangay sang nasambit nga programa agud mapaayo kag mapahagan-hagan ang mga problema sa komunidad.
