ROXAS CITY – Ginpadulungan sang mga kapulisan ang tatlo ka mga persona bangud sa iligal nga pag-utod sang coco lumber, sa Barangay Agsilab, Sapian, Capiz.
Sandig sa impormasyon nagikan sa Sapian MPS, may isa ka persona nga nagpadulong sa ila talatapan agud isugid ang ginapatigayon nga pagsarahe sang puno sang niyog sa nasambit nga lugar.
Sa pagpadulong sang mga kapulisan, tapos na ang pagsarahe, kag sa ila pagpangusisa, ginpahayag sang mga gindakup nga sanday Noel Parohinog, 58-anyos kag Joel Parohinog, 36-anyos, residente sang nasambit nga barangay, nga ila ang amu nga coco lumber.
Sang ginpangayuan sang permit, wala may napresentar ang nasambit nga mga persona.
Wala na sa lugar ang chainsaw operator nga si Roderick Delatina, apang kalakip ini sa naglapas sa R.A. 8048, ukon “Coconut Preservation Act of 1995”, as amended by Republic Act 10593.
Bangud diri, ginpalab-ot sang kapulisan sa talatapan sang Provincial Coconut Authority (PCA) ang nasambit nga insidente, kag ginpakamaayo nga ikustodiya sa Sapian MPS ang nakumpiskar, para sa nagakaigo nga disposisyon.
