ROXAS CITY – Dakop sa akto ang tatlo tanan ka mga tripulante, matapos nagapatigayon sang illegal nga pagpangisda takna 2:10 sang hapon sa Fronting Parola, Barangay Culasi, Roxas City.
Ginkilala ang mga nagkaladakpan nga sanday alyas Fernan, 52 yrs old, residente sang Barangay Libas, Roxas City, Boat Captain, kag mga crew sini nga sanday alyas Ronnie 45-anyos, kag alyas Junito 44 anyos kag ang tag-iya sang nasambit nga fishing boat amu si alyas Robert, nga lunsay mga residente sang Barangay libas, roxas City.
Sa impormasyon nga nakuha sang Bombo Radyo sa Roxas City PNP, natigayon nga madakpan ang mga ini samtang nagapatigayon sang operasyon ang katapo sang Bantay Dagat kaupod ang Taskforce Bantay Dagat sang Roxas City sa lugar.
Narekober sa mga nagkaladakpan ang 1 unit sang Fishing boat nga nagabalor sang P 300,000, Mitsubishi Engine 4D32 nga nagabalor sang 70,000, Fishing gear/net nga nagabalor sang 40,000 kag mas o menus 30 kilos sang nagkalain-lain nga isda nga nagabalor naman sang P 4,500.
Magapangatubang ang mga ini sa panumbungon nga paglapas sa City Ordinance No. 16-2023 ukon Fishing in City Waters Using Active Gear.
Ang mga nakumpiskar nga mga pagkabutang ang yara na sa kustodiya sang Roxas City Fishery/Agriculture para sa nagakaigo nga disposisyon.
