ROXAS CITY – Patay ang 30 anyos nga lalaki matapos ginluthang-patay sa Barangay Bula, Mambusao, Capiz.
Ginkilala ang biktima kay Sulpicio Soriano, residente sang Barangay Maninang, banwa sang Sapian.
Nahibaluan nga nagalakat ang biktima sa karsada sa nasambit nga lugar upod sa iya abyan nga si Efren Loyola, para kuntani magpangita sang gasolina apang gulpi lamang ini nga ginluthang sang wala pa makilan-an nga suspek sakay sa isa ka tricycle.
Suno pa kay Loyola, nakit-an sini nga tatlo ka mga lalaki ang sakay sang nasambit nga tricycle nga nagpalagyo matapos ang krimen.
Gindugang pa sini nga ginbungguan pa sang mga suspek ang biktima nga nagahuray-ad sa dalan.
Nag angkon sang patal nga pilas sa dughan kag tiyan ang biktima nga gintunaan sang iya kamatayon.
Gindala pa sa Mambusao District Hospital ang biktima apang gindeklarar nga dead-on-arrival.
Narekober sa lugar ang walo tanan ka basiyo sang 9mm nga armas luthang.
Sa karon blangko pa ang kapulisan kun ano ang motibo sa nasambit nga krimen kag padayon pa ang imbestigasyon agud matumod ang mga suspetsado.
