Mambusao, Capiz – Padayon nga ginabulong sa ospital sa syudad sang Roxas ang isa ka 32 anyos nga persona matapos gintiro sang kaupod sa ilimnan sa Barangay Caidquid, Mambusao, Capiz.
Ginkilala ang biktima kay Abner Laurelia sang nasambit man nga lugar.
Base sa imbestigasyon sang mga kapulisan nga naggikan ang biktima sa iya sini uyapad kag nagpadulong ini sa malapit nga tiyangge agud magbakal kuntani sang pamahaw sang hinali na lamang nakabati sang komosyon sa tunga sang utod kag suspek nga si Melchor Laniosa, 31-anyos sang amo nga lugar.
Nahibaluan nga luyag na kuntani magpauli sang suspek nga si Laniosa apang ginpunggan pa ini sang utod sang biktima.
Bangud diri, gin-apinan sang biktima ang iya utod kag didto natiruhan sang suspek ang biktima gamit ang 45 Calibre nga armas luthang.
Sa karon, nakahunong na sa karsel sang Mambusao PNP ang suspek.
