Indi pag-intindihanay ang nakita nga motibo sang mga kapulisan sa nagluntad nga shooting incident sa Barangay Poblacion Takas sa banwa sang Cuartero nga ginkaulamiran sang isa ka Sk Chairman kag duha sini ka mga kaupdanan.
Matandaan nga ginkilala ang SK Chairman kay alyas Enric, 24-anyos samtang ginkilala naman ang duha sini ka mga kaupdanan nga sanday alyas Ben, 20-anyos kag alyas Carl, 24-anyos nga lunsay mga residente sang Brgy. Bitoon Ilaya, Cuartero, Capiz.
Bangud sa natabo, naigo sa wala nga dalunggan ang Sk Chairman nga si alyas Enric samtang sa buli naman naigo si alyas Ben, wala naman nag-angkon sang pilas ang kaupod pa sang mga ini nga si alyas Carl.
Sa interview sang Bombo Radyo kay PCPT Alladen Talaban, hepe sang Cuartero Municipal Police Station, ginapahayag nga nagikan ang mga suspek kag mga biktima sa isa ka sugalan sa nasambit nga banwa kag nagkitaay ang mga ini sa ginluntaran sang insidente.
Dugang pa ni Talaban, nagpauli ang 37-anyos nga suspetsado kag nagkuha sang armas sa ila balay kag sang nakabalik na ini sa lugar, ginhatag sini ang armas sa iya utod nga ginatudlo nga gunman nga tiruhon na ang mga biktima kag gilayon man sini nga gintuman ang mandu sang iya magulang ngatiruhon ang mga ini.
Narekor sang mga kapulisan sa lugar ang 6 tanan ka basiyo sang caliber 45 nga armas luthang apang wala naman sang mga ini nakuha ang armas nga gingamit bangud dala-dala ini sang gunman nga madasig nga nakapalagyo matapos nakumiter ang pagpangtiro.
Nahibaluan nga yara sa impluwensya sang makahulubog nga ilimnon ang magtimbang nga bahin sang natabo ang insidente.
Samtang, nagpakig-angut na ang mga kapulisan sa tatay sang suspek nga kumbinsihon ang iya bata nga mag-surrender na sa mga otoridad.
Sa karon, yara na sa paghinakop sang Cuartero MPS ang 37-anyos nga suspek matapos ini nga nadakpan sa ginpatigayon nga hot pursuit operation sang mga kapulisan, samtang nagapabilin naman nga at large ang 36-anyos nga manghod sini nga ginatudlo nga gunman.
