Nalumos-patay ang 37-anyos nga lalaki matapos nahulog sa isa ka sakayan-pandagat sa kalalawran nga sakop sang sibuyan.
Ginkilala ang biktima kay Joly Iglesia, 37-anyos, isa ka makinista sang sakayan pangpangisda kag residente sang Brgy. Libas syudad sang Roxas.
Sa nakuha nga impormasyon sang Bombo Radyo sa lugar, takna ala-6 sang aga, Nobyembre 22, natalupangdan nalang sang mga kaupdanan sini nga wala na ang biktima samtang nagahiwat ini sila sang dragging.
Dugang pa sini, gintinguhaan pa nila nga pangitaon ang biktima, tubtob sa nag-abot ang isa pa ka fishing boat agud nga magbulig pangita sa biktima.
Samtang, takna alas-3:00 na sang hapon, sa kapareho nga adlaw, nasapwan nalang sang mga ini nga naga lutaw-lutaw na kag wala sang kabuhi nga biktima nga gilayon naman nga ginpatakas kag gindala sa libas fishing port.
Sa karon, yara na ang bangkay sang biktima sa isa ka punenarya sa Roxas Avenue samtang padayon naman ang ginahiwat nga imbestigasyon sang mga otoridad angut sa nasambit nga insidente.
