ROXAS CITY – Kadungganan indi lang sang College of St. John Roxas kundi amu man sang probinsya sang Capiz ang apat ka Grade 12 ABM students matapos magkampyon sa Philippine Chamber of Commerce and Industry (PCCI) Business Idea Development Award (BIDA) 2022 sa Taguig Metro Manila.
Ang apat ka representante kag pinakabata nga nagpasakop sa nasambit nga national competition amu sanday Mitzi Yuri Seloso, Kyla Jane Turbanos, Ronel Balasa kag Heather Gwen Dalida.
Sa interview sang Bombo Radyo kay Mr. Michael Vincent Barrera, nagserbe nga coach, ginsiling sini nga apat ka kategorya ang kompetisyon kag ang ila ginpasakupan amu ang service category kun sa diin ang ila gingamit nga entry may tig-ulo: SEAFOODELI.
Na-defend suno diri sang maayo sang nasambit nga mga estudyante ang ila study rason nga sila man ang gindeklarar nga kampyon.
Sa bahin naman ni Dalida, aminado siya nga pressured sila nga apat bangud sang nagligad nga tuig nagdaog man ang ila buluthoan sa nasambit nga kompetisyon.
Apang, bangud sa ila pagbinuligay, ila gid nakuha ang back-to-back championship.
Ginpakigbahin man sini nga ang SEAFOODELI isa ka app nga magakonek sa mga consumer kag local fishermen, pinaagi sini masuportahan nila ang mga mangingisda sa syudad sang Roxas kag probinsya sang Capiz.
Dugang ni Balasa nga mangin mahupos ini para sa fisherfolks kun sa diin pinaagi sa app indi na nila kinahanglan magpadulong sa merkado agud magbaligya, sa baylo magahulat nalang sila sa Seafoodeli service.
Samtang, ginpahayag ni Seloso nga may gamay siya nga experience sa pagnegosyo bangud nagaumpisa na siya online selling kag ginakabig niya nga daku nga oportunidad sa ila nga apat nga ginrepresentar indi lang ang ila buluthoan kundi amu man ang bug-os nga Capiz.
Sa bahin naman ni Turbanos, wala nila gin-ekspektar nga sila ang magakampyon gani nangin emosyonal man sila ni Seloso sang malawagan.
Nagalaum si Barrera nga ang sa karon concept paper pa lamang ang ma-implementar sa pila ka adlaw kag mangin isa na ka app agud madasig kag gilayon na nga mabuligan ang mga mangingisda kag mapauswag ang ekonomiya ukon seafood industry sang Capiz.
Mensahe sini sa apat ka mga estudyante nga piyerme siya nagapati sa ila kapasidad kag potesyal.
Ginapanugyan niya man nga kun makagradwar na ang mga ini, indi pagkalimtan ang pagsulundan kag mga gintudlo sa ila buluthoan bangud nagapati siya nga madamo pa sila malab-ot sa ulihi.
