ROXAS CITY – Nakatipon na sang pirma para sa ginaduso nga People’s Initiative ang apat ka kabanwahanan sa probinsiya sang Capiz.
Sa interview sang Bombo Radyo kay Provincial Election Supervisor, Atty. Wil Arceño, gintuad sini nga nabaton na nila ang kopya sang mga nagpirma sa ginaduso nga people’s initiative para sa Charter change ukon Cha-cha nagikan sa apat ka kabanwahanan sa probinsiya partikular sa segundo distrito.
Suno kay Atty. Arceño, ang nakasumiter nga kabanwahanan nga nagpirma sa petisyon amu ang banwa sang Dumarao kun sa diin sa 685 ka panid may yara sang 6,582 ka pirma; banwa sang Dumalag 4,657 ka pirma sa 486 ka panid; banwa sang Sapian nga may yara 2,140 ka pirma sa 207 ka panid kag banwa sang Sigma nga may yara naman sang 4,270 ka pirma.
Sa kubug-usan suno kay Atty. Arceño may yara sang masobra 18,000 plus na nga mga pirma ang ila nabaton sa apat ka kabanwahanan sa probinsya para sa ginaduso nga people’s initiative.
Ginpahayag pa sini nga sa amu nga numero ang bastante na sa requirements nga 3% sa total voters sa kada distrito.
Sa karun ginahulat pa nila ang pila ka kabanwahanan nga posible magapasa sa ila talatapan.
Ginklaro man ni Atty. Arceño nga wala sang kahilabtanan ang COMELEC sa sini nga petisyon kundi pangpribado ini nga butang.
