Pilas sa magkatuhay nga parte sang lawas ang naagum sang 5 ka mga persona matapos magbungguanay ang ginasakyan nga mga motorsiklo sini sa Barangay Burias, Mambusao, Capiz.
Sa interview sang Bombo Radyo sa hepe sang Mambusao Municipal Police Station nga si PCapt. Rey Dordas, ginkilala ang Driver 1 nga si Alyas “Ken”, kag backrider sini nga si Alyas “Ban”, lunsay yara sa legal nga pang-edaron kag lunsay residente sang banwa sang Jamindan kag Alyas “Al”, nga residente naman sang Sapian, Capiz.
Samtang ang Driver 2 ang ginkilala kay Alyas “Sam”, kag backrider sini nga si Alyas “Thoto” lunsay minor de edad kag lunsay residente sang banwa sang Mambusao.
Suno kay Dordas, samtang ginasubay sang Driver 1 kaupod ang mga backrider sini ang dalan sakay ang Suzuki Smash nga motorsiklo nagaduag itom nagikan sa Poblacion Mambusao kag padulong kun tani sa Buria proper apang pag-abot sa lugar nga ginluntaran sang insidente hinali lamang nga bumunggo ang kasugata sini nga Suzuki Smash nga motorsiklo nga nagaduag itom nga ginamaneho sang Driver 2 sakay ang backrider sini.
Bangud sa makusog nga impact, natumba ang duha ka motorsiklo kabangdanan sang ila mga pilas nga gilayon naman ginrespondihan sang katapo sang Mambusao Emergency Rescue Unit (MERU) agud hatagan sang pauna nga pagbulong antes ginpadangat sa Mambusao District Hospital kag Sen. Gerardo Roxas Memorial District Hospital, para sa nagakaigo nga pagbulong.
Samtang, yara naman sa kustodiya sang Mambusao MPS ang duha ka motorsiklo para sa nagakaigo nga disposisyon.
