PANAY, CAPIZ – Natalana nga pasakaan sang nagakaigo nga panumbungon ang duha ka mga persona nga ginaalegar suspek sa pagkastigo sa 51-anyos nga lalaki sa Barangay Pawa, Panay, Capiz.
Base sa inisyal nga imbestigasyon sang Panay Municipal Police Station, samtang nagapungko ang biktima nga si Victor Billones, hinali na lamang ini nga ginbungguan sang motorsiklo sakay ang mga suspek nga sanday Obaldo Nicson Besana kag Benjie Besana, lunsay residente sang nasambit nga barangay.
Ginaalegar nga gintuyo pa nga bun-on ni Nicson si Billones sang dala sini nga kutsilyo samtang ginlampusan naman ni Benjie sang tubo sa ulo ang biktima.
Nagkuha naman sang pala ang biktima kag amo ang gingamit sa paglampos sa mga suspek.
Bangud sa kinagamo, lunsay nag-angkon sang mga pilas sa lawas ang tatlo ka mga persona kag gin dala sa ospita agud mabulong.
Sa karon, ginahikot na sang biktima ang mga kinahanglanon nga dokumento mapasakaan sang panumbungon ang mga suspek.
Posible nga magpangatubang ang mga suspek sang kaso nga Attempted Homicide.
