ROXAS CITY – Pilason ang isa ka 56-anyos nga persona matapos nga ginaalegar ginbuno sang iya magulang sa Barangay Ilas Norte, Dao, Capiz.
Ginkilala ang biktima nga si Mariano Escomen sang nasambit nga lugar.
Base sa inisyal nga imbestigasyon sang Dao Municipal Police Station nga samtang nagainom-inom ang biktima kag suspek nga si Segundo Escomen 61-anyos sang hinali na lamang nga nag-angkon sang komosyon sa tunga sang nasambit nga mga persona.
Bangud diri, nagpauli ang suspek kag nagkuha sang kutsilyo nga gingamit sini sa pagbuno sa biktima.
Nag-angkon naman sang pilas sa tiyan si Mariano nga gilayon naman gindala sa ospital agud dapatan sang nagakaigo nga pagbulong.
Samtang, boluntaryo naman nga nagsungka sa mga kapulisan si Segundo matapos ang insidente.
Ginapatihan naman nga motibo sa krimen ang daan nga hiligut-anon sa tunga sang suspek kag biktima.
Padayon naman ang ginapatigayon nga imbestigasyon sang mga otoridad sa nasambit nga insindente.
