ROXAS CITY – Dead on arrival nga ginpadangat sa Tapaz District Hospital ang 7-katuig nga bata nga lalaki, matapos ini makuryente, sa Barangay Daan Sur, Tapaz, Capiz.
Ang wala na ginhingadlan nga biktima ang residente sang amu nga lugar.
Sandig sa impormasyon nga nakuha sang Bombo Radyo sa Tapaz Municipal Police Station, nga kahapon Marso 1, samtang nagalakat sa kilid sang dalan ang nasambit nga bata, aksidente sini nga nasalapay ang nautod nga kable sang kuryente sang Capiz Electric Cooperative (CAPELCO).
Wala man ginsiling kun may upod ang bata nga nagalakat ukon nagaisahanon lang ini.
Nahibaluan nga Pebrero 26, pa sang mautod ang amu nga kable.
Nagapati ang pamilya sang biktima nga wala sang iban nga rason sa kamatayon sang ila himata.
Sa karon, yara na sa isa ka punerarya ang bangkay sang bata.
