ROXAS CITY – Tuman ka importante sa karon ang kooperasyon sang pumuluyo nga isegregar ang tagsa ka mga basura agud mapahagan-hagan ang pagpuno sang basura sa sanitary landfill sa bahin sang Brgy. San Jose, Roxas City.
Ini ang ginpahayag ni Mr. Ronald Amigo, tagpamuno sang Roxas City Environment and Natural Resources (CENRO) sang ma-interview sang Bombo Radyo.
Suno diri, 90% na ang basura nga yara sa 1st cell sa nasambit nga sanitary landfill kag pila nalang ka bulan mapuno na ini.
Sa pihak sang ini nga problema ginatinguhaan man sang city government kag CENRO nga maaprubahan na ang contractor nga amu ang magakutkot sang 2nd cell.
Apang, ginabulubanta 6 ka bulan pa antes matapos ang ikaduwa nga cell kag pananglitan mapuno na ang 1st cell, kag indi pa ini matapos, posible nga indi na makolekta ang mga basura sang pumuluyo.
Ginapanawagan sang CENRO sa pumuluyo sang Roxas City nga magkooperar kag isegregar ang basura bangud pinaagi sini, indi gilayon mapuno ang sanitary landfill.
