Nagpagwa sang pahayag ang aktres kag TV host nga si Anne Curtis nahanungod sa kontrobersiya sa ginaalegar nga bastos nga “analogy” ni Quezon City 4th District Representative Bong Suntay sa ginpatigayon nga hearing sang House of Representatives.
Sa iya post sa Instagram, ginpahayag ni Anne nga naghipos siya bangud gin-una niya ang pag-amlig sa iya pamilya nga na-stranded sa Middle East.
Apang subong nga nakabalik na siya sa Pilipinas, dapat suno sa iya magpagwa na ini sang reaksyon, indi para sa pagtimalos ukon mag-drama, kundi bangud sala para sa iya kag sa tanan nga mga kababainhan nga naga-eksperyensya sang kaangay nga sitwasyon nga maghipos lang.
Ginsaway man sang aktres ang pahayag sang kongresista, nga ginatawag ini nga “bastos kag sexualized,” ilabi na nga ang iya ngalan ginaalegar gingamit nga wala sang pahanugot kag wala sang respeto.
Gin-ako sini nga nasakitan, nasubuan kag naakig sa paagi sang pagtumod sa iya nga pangalan.
Suno sa aktres, indi tumalagsahon ang ini nga eksperyensya bangud madamo nga mga kababainhan ang gakabaton sang sexual comments kada adlaw, apang mas makahalanusbo bangud naghalin ini sa isa ka opisyal sang gobyerno.
Wala man ginbaton ni Anne ang pagpangayo sang pasaylo ni Suntay, apisar nga gin-ako sini nga ginabaton nya ang pagpangayo sang pasaylo sang iya asawa.
Ginpanindugan man niya nga ang insidente nagapakita sang mas malapad nga problema sang sexism sa katilingban kag nagpanawagan sa mga awtoridad, lakip ang ethics committee, nga imbestigaran ang insidente.
