Hugot nga ginpamatukan sang aktor-host nga si Dingdong Dantes nga “false” ang post nga nagasiling nga nagkomento ini sa pagpadalagan ni Vice President Sara sa pagkapresidente sa 2028 elections.
Napahayag sa amo nga post gikan sa account nga may profile name nga Amy Imperial Ugay, nga ginpahayag sang aktor nga “makahaladlok kon magdaug si VP Sara bangud makita niya sa iya ang kaisog, kaalam kag ikasarang sa pagpanguna kaangay sang IYA AMAY,” nga si Former President Rodrigo Duterte.
Apang gilayon ini nga ginpanginwala sang aktor kag gin-athag sa iya caption nga wala niya ini ginhambal.
Nakakuha naman ang post sang aktor sang isa ka milyon nga reactions, masobra 18,000 ka mga comments kag 33,000 ka mga shares.
Gin-delete naman sang uploader ang iya post kag nagpangayo sang pasaylo sa aktor matapos nga naglapta ang amo man nga post sa iban nga online platforms.
Gin-ako man sini nga makahuluya ang iya sala apang ginpahayag sini nga mas makahuluya ang mangin kawatan.
