Ginpahayag sang Philippine National Police (PNP) nga nakaposas kag magasuksok sang bulletproof vest buwas si dismissed Bamban, Tarlac Mayor Alice Guo padulong sa Senado agud magtambong sa legislative investigation natuhoy sa ilegal nga Philipine Offshore Gaming Operators (POGO).
Suno kay PNP spokesperson Police Colonel Jean Fajardo, ang PNP coaster nga sakay si Guo ang magabalhin sa kampo krame sa Quezon city sa takna alas-otso sang aga buwas samtang ang senate hearing naman ang magasugod sa takna alas-10:00 sang aga.
Una na nga gin-aprubahan sang Tarlac court ang hinyo sang Senado nga patambungon si Guo sa hearing. Ang Capas, Tarlac Region Trial Court ang nag isyu sang warrant of arrest kay Guo matapos ini nga ginpasakaan sang Department of Interior and Local Government (DILG) sang kaso nga paglapas sa RA 3019 ukon Anti-Graft and Corrupt Practices Act, rason nga naka-detain ini sa karon sa custodial facility sang PNP.
Sa karon, nagapabilin si Guo sa anay detention room ni former senator Leila de Lima, matapos ini nga indi magpyansa sa ginpasaka nga kaso sa iya.
