Roxas City- Ginreklamo sang amay ang indi maayo nga pagtatap sang medical staff sang Bailan District Hospital sa tatlo ka mga lapsag. Ginpahayag ni Reyland Bataican sang Barangay San Pedro Jolongajog, Pontevedra, Capiz nga mismo nasaksihan sini ang pagpabaya sang mga nurses sa iya mga anak sa diin naghinyo ini sa medical staff kun ano ang maayo nga himoon bangud naluoy na ini sa sitwasyon sang triplets.
Nagdala sang pump apparatus ang mga nurses nga amo ang gingamit sa duha ka mga lapsag nga nabudlayan sa pagginhawa. Apang wala nagdugay kag ginbilin sa iya sang mga nurses ang ila ginahimo nga pagpump sang apparatus para makabulig sa pagginhawa sang mga bata bangud may iban pa ini nga himoon. Nagpamalibad pa ini kuntani apang wala sang nahimo kag nagpatudlo na lamang agud mabuligan ang mga anak. Tobtob ginbilin man sang isa ka nurse sa menor de edad nga hinablos ang pagpump sang appartus sa isa sa mga triplets bangud may ulubrahon pa ini.
Wala nadugayan kag nakit-an na lamang ni Reyland nga nagguwa na ang dugo sa ilong kag baba sang duha ka mga lapsag sa diin ginpatawag sini liwat ang mga nurses. Gilayon man nag-abot ang nurse kag gin-check ang pulso sang mga lapsag apang wala na ini nagapitik tobtob nga gindeklara nga patay na ang mga ini. Nagapati si Reyland nga posible sala ang pamaagi sang ila nga pagpump sang apparatus rason nga wala naka-survive ang duha ka lapsag.
Matapos ang natabo wala ginbalikan sang duha ka mga nurses ang napatay nga mga lapsag sa diin sila na lamang ang nagmato mato nga magpangita sang pamaagi kag ginputos ang duha sa lampin kag ginsulod sa karton kag gindala pauli. Sa karon nagapangayo sang hustisya ang pamilya Bataican sa pagkamatay sang duha sa tatlo ka mga triplets bangud sa kapabayaan sang nasambit nga ospital.
