ROXAS CITY – Kapin sa dos milyones pesos nga balor sang alahas ang nataban sang wala pa makilala nga kawatan sa balay sang anak sang anay gobernador sang probinsiya sang Capiz sa Barangay Tanza, Roxas City.
Nadiskubrehan na lamang ni Suzanne del Rosario Ignacio kaupod ang bana sini nga bukas na ang mayor nga gate sang ila nga balay kag nagasiga na ang suga sa ila nga kuwarto.
Sa pagtsekyar sang tagreklamo sa sulod sang ila hulot nakit-an nga bukas na ang safe box nga ginabutangan sang mga alahas nga nagabalor sang P2 milyones.
Kalakip sa mga gintaban sang kawatan ang mga aritos, bracelet, relo kag singsing nga nagalab-ot sa duha ka milyon ka pesos.
Ginapatihan nga ginhingalitan sang suspek ang kahigayunan nga may ginapatigayon nga derby sa bulangan nga malapit sa balay sang pamilya Ignacio kag nagsulod ini kag nagpangawat.
Sa karon padayon ang imbestigasyon sang kapulisan agud matumod ang suspek nga nagpangawat sang malahalon nga mga alahas ni Mrs. Suzanne Ignacio, isa ka negosyante sa Capiz.
