ROXAS CITY – Balik liwat sa karsel ang maglive-in partner, matapos nga nadakpan sa ginkasa nga drug buy bust operation sang mga katapo sang Station Drug Enforcement Team (SDET) sang Roxas City PNP sa Sitio Cassandra, Barangay Punta Tabuc, Roxas City.
Ginkilala ang mga persona nga sanday Jirah Mae Valencia, kag live-in partner sini nga si Omar Arandes, lunsay sa legal nga pang-edaron kag residente sang nasambit nga lugar.
Nakuha sa kontrol kag posesyon sang duha ang napulo tanan ka sachets sang ginaalegar shabu, P500 nga buy bust money, 1 ka unit sang homemade shotgun, 3 ka bala sang 12-gauge shotgun kag 1 ka bala sang .45 calibre nga armas-luthang.
Ginkumpirmar ni Punong Barangay Nestor Buenviaje, nga yara sa ila Barangay Anti-Drug Abuse Council (BADAC) nga listahan ang maglive-in partner, apang wala sila nagkulang nga mga opisyales nga paandaman nga mag-untat sang ila iligal nga bulohaton.
Suno naman kay PSMS Ramil Arcangeles, tagpamaba sang Roxas City PNP, nga nakaguwa ang duha sang tuig 2019 pinaagi sa plea bargaining agreement apang nahibaluan nga nagpadayon ang mga ini sa ila iligal nga bulohaton, rason nga kapin isa ka bulan ang ila monitoring antes ang madinalag-on nga operasyon.
Ginpasalig man sang kapulisan nga bangud natalana nga magabun-ag ang babayi nga suspek, ginpasiguro diri nga indi mapabay-an ang iya mangin bata.
Magapangatubang sang panumbungon nga paglapas sa RA 9165 ukon Comprehensive Dangerous Drugs Act of 2002 kag dugang nga paglapas sa RA 10591 ukon Illegal possession of Firearms and Ammunition ang nasambit nga mga persona.
