ROXAS CITY- Kumpirmado nga apat ka mga persona kalakip na ang isa ka elected Barangay officials ang imbolbado sa pagbitay kag pagpatay sang ido matapos ini nga nagtrending sa social media sa banwa sang Pilar.
Sa interview sang Bombo Radyo kay PSMS. Elmer Balgos, Investigator sang Pilar PNP, ginpahayag nga ginpadulongan sini ang amo nga lugar kaupod ang Animal welfare kag gin-usisa ang panghitabo.
Ginpahayag nga ang mga imbolbado amo ang nagbitay, nagpatay, tag-iya kag ang nagvideo.
Suno sa ila pagpadulong sa lugar naka-atubang man sini ang apat ka mga imbolbado kag ginsaysay sang mga ini ang hitabo.
Gintuad sang tag-iya sang ido nga siya ang nagsugo sa iban pa nga mga imbolbado sa insidente bangud nagapamintas sa mga manok, nagabuang, kag nagapangagat ang amo nga ido rason nga ila nalang ini gin-aksyunan bangud malapit lamang ini sa eskwelahan sa amo nga lugar kag nahadlok ini nga makahalit pa sa iban rason nga ila nalang ginpatay.
Apang sa gihapon kinahanglan nga mangatubang sa kaso ang amo nga mga imbolbado bangud indi rason ang pagbuang kag pagpamintas sang ido agud ila ini patyon.
Wala na sang ginmensyunar ang mga imbolbado kun sa diin napahamtang ang ido rason nga hatagan pagtamud sang mga katapo sang kapulisan kag padalman pa ang imbestigasyon.
