ROXAS CITY – Madamo nga igu sang tapungol, blood clot sa ulo kag pagkalumos ang gintunaan sang kamatayon sang Sakristan nga napatay nga si Joey Dumangon, sang Barangay Anhawon, Panay, Capiz.
Ini ang ginkumpirmar ni Police Staff Seargent Bryan Zen Bacay, imbestigador sang Panay MPS sang mainterview sang Bombo Radyo.
Suno diri, sandig sa ginpatigayon nga medico legal ni Police Colonel Joe Martin Fuentes sang Regional laboratory office 6 nga nag-angkon sang injury ang Sakristan sa iya nga dughan, sag-ang, nawala nga mata, li-og kag sintido sang iya dalunggan.
Dugang pa diri, posible nga ma-comatose ang biktima kun nakit-an ini nga wala nalumos.
Posible man nga sa pagpanago sang Sakristan, nalipong ini antes nalumos.
Nagaguwa pa sa imbestigasyon nga posible wala na may nagsunod sa biktima sa iya ginpanaguan, bangud tuman ka dulom sang lugar kag taub ang suba.
Bangud man sa pagkalumos natural lang suno diri nga magguwa ang dugo sa ilong sang biktima, kag ginapatihan nga masobra na 24-oras nga nakahulom ini sa tubig.
Nahibaluan nga may kaiping nga balay sa gintunaan sang insidente apang ginpahayag sang tagbalay nga wala sila sang may nabatian nga nagpangayo sang bulig.
Magapasaka man sang kaso ang pamilya Dumangon batuk sa mga suspek apang pagahulaton nila nga malubong ang bangkay sang ila himata.
Suno sa kapulisan, homicide ukon murder ang paga-atubangon sang mga suspek.
Ginpasalig sang Panay MPS nga pagabulogan nila nga mapasakaan sang kaso ang mga suspetsado.
